Në zbatim të Ligjit Nr.10433, datë 16.06.2011 “Për inspektimin në Republikën e Shqipërisë”, Ligjit 9634, datë 30.10.2006 “Për Inspektimin e Punës”, i ndryshuar, Ligjit Nr. 121/2016, datë 24.11.2016 “Për shërbimet e kujdesit shoqëror në Republikën e Shqipërisë”, VKM 295, datë 20.03.2013 “Për krijimin, organizimin dhe funksionimin e ISHPSHSH-së”.
Inspektorati Shtetëror i Punës dhe Shërbimeve Shoqërore ka për mision kontrollin, konstatimin, këshillimin, njoftimin, formimin, zbutjen e konflikteve, parandalimin dhe sanksionimin, si dhe garantimin e respektimit të kërkesave ligjore në fushën e legjislacionit të punës dhe të atij të shërbimeve shoqërore.
Për përmbushjen e misionit, Inspektorati Shtetëror i Punës dhe Shërbimeve Shoqërore, kryen detyrat e mëposhtme:
- Kontrollon të gjitha subjektet juridike dhe fizike për zbatimin e Legjislacionit të Punës dhe të Shërbimeve Shoqërore.
- Jep informacion dhe këshilla teknike punëdhënësve dhe punëmarrësve për zbatimin e Legjislacionit të Punës dhe të Shërbimeve Shoqërore.
- Regjistron dhe heton aksidentet në punë dhe sëmundjet profesionale.
- Bashkëpunon me institucione të tjera në drejtim të shkëmbimit të informacionit, kontrolleve të përbashkëta, përmirësimin e sistemit të raportimit të statistikave nëse është e nevojshme.
- Vë në dijeni organet kompetente për mangësitë dhe abuzimet, që nuk mbulohen në mënyrë të veçantë nga dispozitat ligjore në fuqi, si dhe të propozojë mjetet dhe instrumentet e nevojshme për përmirësimin e gjendjes.
- ISHPSHSH-ja në nivel qendror është përgjegjës, për të gjithë institucionin, duke përfshirë edhe drejtoritë në nivel rajonal, për:
- menaxhimin e burimeve njerëzore, çështjeve ligjore, teknologjinë e informacionit, mirëmbajtjen dhe shërbimet e tjera mbështetëse;
- përgatitjen dhe zbatimin e buxhetit, mbajtjen e kontabilitetit dhe kryerjen e auditimit të brendshëm. )